घोराही, माघ १२ । लुम्बिनी प्रदेशका उद्योग तथा यातायात व्यवस्था मन्त्री सरोज थापा (रोज राणा) ले घोराहीमा यातायात व्यवस्था कार्यालयको सेवा कार्यालय छिटो भन्दा छिटो स्थापना गर्न आफुले पहल गर्ने बताएका छन । घोराही बनाऔं अभियानले बिहीबार घोराहीमा आयोजना गरेको भेटघाट कार्यक्रममा बोल्दै उनले यस्तो बताएका हुन ।
‘यातायात क्षेत्रको व्यापक सुधारका लागि म क्रियाशिल छु, सर्वसाधारणलाई सहज सेवा दिने सवालमा मैले सक्दो काम गर्नेछु’ मन्त्री थापाले थपे , ‘म घोराहीमा यातायातको सेवा कार्यालय खोल्ने सवालमा सम्बन्धित अन्य पक्षहरुसँग छलफल गरेर केही गर्नेछु ।’
घोराही बनाऔं अभियानका संयोजक सविन प्रियासनको नेतृत्वमा आयोजित भेटघाट कार्यक्रममा बोल्दै मन्त्री थापाले यातायात क्षेत्रमा रहेको सबै खाले बिकृतिलाई जसरी हुन्छ अन्त्य गर्न लागि पर्ने बताउँदै यातायात क्षेत्रको सुधारका लागि सबैले साथसहयोग गर्नुपर्ने बताए । घोराहीमा यातायात व्यवस्था कार्यालयको सेवा बिस्तारको सन्दर्भमा मन्त्रालयमै आएर भेटघाट गर्दा अझ बढि प्रभावकारी हुने र यस विषयमा सचिवलगायत कर्मचारीहरुसँग पनि बुझेर निर्णय गर्नु पर्ने भएकाले अभियानकर्मीहरुलाई मन्त्री थापाले मन्त्रालयमा आमन्त्रण समेत गरे ।
